ENERJİ DOLDURMA MƏNTƏQƏLƏRİNİN ENERJİ TƏLƏBATININ TƏMİN EDİLMƏSİ ÜÇÜN PAYLAYICI ŞƏBƏKƏLƏRİN GÜCLƏNDİRİLMƏSİ TƏDBİRLƏRİ

Abstract

Elektrik enerjisinin kəşfindən sonra həyatımızda artıq yeni bir inkişafın başlandığını qeyd edə bilərik. Müasir dövrümüzü elektrik enerjisiz təsəvvür etmək çox çətindir. Həyatımızın istənilən anında sözügedən bu enerjidən istifadə etmək artıq bizim gündəlik tələbatımıza çevrilmişdir. Bəs elektrik enerjisini bu qədər dəyərli edən nədir? Əlbəttə ki, planetimizdə elektrik enerjisini almaq üçün kifayət qədər resursların olması, asanlıqla bir enerji növündən digərinə (istilik, işıqlanma, fırlanma) çevrilə bilməsidir. Həyatımıza elektrik enerjisi daxil olduqdan, yəni elektrik enerjisi ilə işləyən avadanlıqlardan istifadə etməyə başladığımız andan işlərimiz xeyli dərəcədə asanlaşmış, gündəlik yaşam tərzimiz dəyişmişdir. Misal olaraq, ev alətlərini - elektrik çıraq və sobalarını, fen, tozsoran, mikro mühərrikli diş fırçalarını və s. göstərmək olar. Elektrik enerjisinin müsbət xüsusiyyətləri ilə yanaşı bir sıra mənfi xüsusiyyətləri də vardır ki, ən başlıcası - uzun müddətdə toplana bilməməsi və tez bir zamanda ötürülməsinin zəruriliyidir. Həmçinin, ətraf mühitə göstərdiyi təsirdir. Son dövrlərdə vacib məqamlardan biri də artıq elektrik, elektron əşyalara tələbatın günü-gündən artmasıdır ki, bu da, öz növbəsində elektrik enerjisi sərfiyyatının artmasına gətirib çıxarmaqdadır. Statistikaya nəzər yetirsək görərik ki, ölkəmizdə və bütün dünyada elektrik enerjisinə tələbat artan templə davam etməkdədir. Bunun nəticəsində elektrik stansiyaları öz generasiya güclərini artırır və ya, ölkədə yeni elektrik stansiyalarının inşasına zərurət yaranır. Yeni elektrik stansiyasının inşası və yaxud mövcud olan stansiyanın generasiya gücünün artırılması bir sıra problemlərə gətirib çıxarır. Burada ən vacib problem ətraf mühitin çirklənməsidir. Məhz buna görə artıq elm adamları həyəcan təbili çalır və insanları ətraf mühitə zərərsiz olan bərpa olunan enerji mənbələrindən istifadəyə çağırır. Gələcək nəsillərə daha təmiz dünya miras qoymaq, onların sağlam şəkildə yaşamasını təmin etmək artıq priorotet məsələyə çevrilmişdir. Son dövrlərdə bəşəriyyətin təbiətə, ətraf mühitə vurduğu təsirlər bu məsələnin aktuallığını artırmışdır.