5G MOBİL RABİTƏ ŞƏBƏKƏLƏRİNDƏ TƏHLÜKƏSİZLİK PROBLEMLƏRİNİN ANALİZİ

Abstract

Müasir dövrdə 2G, 3G və 4G mobil rabitə texnologiyalarından çox geniş istifadə olunmaqdadır. Ən sadə formada insanlar arasında səs rabitəsinin təşkil olunması ilə başlayan macəra bu gün artıq kritik infrastrukturun idarə olunması daxil olmaqla həyatımızın hər bir sahəsinə nüfuz etmişdir və bu texnologiyaların tətbiq sahələri artmaqda davam etməkdədir. Bəzi hallarda, bu texnologiyaların arxitekturasında mövcud olan boşluqlardan istifadə etməklə mobil şəbəkələrə hücumlar təşkil olunmaqdadır. Bunlara misal olaraq radio efirin analizi vasitəsilə məlumatların əldə edilməsi və ya saxta rouminq şəbəkələr üzərindən həyata keçirilən manipulyasiyalar göstərilə bilər. Bu tip “əməliyyatlar” məlumatların icazəsiz əldə olunmasına gətirib çıxarmaqla yanaşı bəzi hallarda istifadəçi xidmətlərinə birbaşa təsir göstərən daha ciddi fəsadlara da səbəb ola bilər. Müasir dövrdə insanların artıq həyatın hər sahəsində bu texnologiyalara olan yüksək asılılığını nəzərə alaraq ənənəvi şəbəkə texnologiyalarındakı mövcud təhlükəsizlik problemlərinin səbəblərinin ətraflı araşdırılmıası və son dövrlərdə tətbiq olunmağa başlanılan 5G şəbəkələrdə də bu problemlərin mövcud olub olmamasının təyin olunması mühüm əhəmiyyət kəsb edir.