Veriş hərəkətinin optimallaşdırılması əsasında RPİ olunan dairəvi pardaq dəzgahının məhsuldarlığının artırılması

Abstract

Dissertasiya işində RPİ olunan dairəvi pardaq dəzgahında həyata keçirilən emal prosesi zamanı veriş hərəkətinin optimallaşdırılmasının məhsuldarlığın artırılmasına təsiri ilə bağlı araşdırmalar aparılmış və müvafiq nəticələr əldə edilmişdir: 1. RPİ olunan dairəvi pardaq dəzgahlarında istehsal və emal olunan detalların və ya iş parçalarının keyfiyyətinin artırılması çoxlu sayda mühüm texniki və texnoloji faktorlardan asılıdır. Sözügedən prosesin uğurlu icrası üçün pardaqlama sürətinin düzgün seçilməsi əsas şərtlərdən biridir. 2. Veriş hərəkətinin (radial, ox, xətti, uzununa, eninə və s.) icrası kifayət qədər mürəkkəb və çətin proses olduğu üçün detalın və ya iş parçasının emalının bütün mərhələlərində (qaralama, yarımtəmiz, təmiz, bitirmə) işçi komponentlərin seçilməsi və tətbiq edilməsi rəqəmli proqramla idarə olunan xüsusi elektron xəritə üzrə həyata keçirilməlidir. 3. Kompüterləşdirilmiş dəzgah sistemlərinin, o cümlədən RPİ olunan dairəvi pardaq dəzgahlarının səmərəliliyinin artırılmasında çoxlu sayda mühüm elementlər iştirak edir. Onlar emal prosesində iştirak edən çox vacib komponentlər kimi ayrı-ayrı əməliyyatların, həmçinin veriş hərəkətinin optimallığını və səmərəliliyini təmin edən mexanizmlər kimi çıxış edir. 4. Pardaqlama zamanı məhsuladarlığın artırılmasını təmin edən veriş hərəkətinin optimal sürətinin əldə edilməsi və onun fasiləsiz texniki nəzarət altında saxlanılması kimi son dərəcə çətin və mürəkkəb prosesi uğurla icra etmək və RPİ olunan pardaq dəzgahlarında emal olunan iş parçasının keyfiyyətini və dəqiq ölçülərini təmin etmək üçün dəzgahın bütün işçi orqanlarının rəqəmsal sistemə uyğun işləməsi tələb olunur. 5. Emal prosesində veriş hərəkətinin texniki parametrləri arasında əlaqələrin yaradılması RPİ olunan pardaq dəzgahlarında iş rejiminin təkmilləşdirilməsinə və məhsuldarlığın artırılmasına həlledici təsir göstərir. 6. RPİ olunan dəzgahların, o cümlədən dairəvi pardaq dəzgahlarının proqram təminatı ardıcıl və məqsədyönlü şəkildə reallaşdırılan texniki və intellektual prosesdir və istifadəçidən bütün bilik, bacarıq və vərdişlərinin səfərbər edilməsini tələb edir.